Alfred Bjørlo: Kvil i fred, ABC Oslo. Eit tap for heile landet

Denne veka avga Helse- og omsorgskomiteen si innstilling i saka om Venstre sitt representantforslag om å halde oppe ABC-klinikken ved Ullevål sjukehus i Oslo. Klinikken er planlagt nedlagt frå mars 2023.

Høgre gjorde der felles sak med regjeringspartia, og vender tommelen ned for Venstres framlegg. Dermed sette Høgre den siste spikaren i kista for ABC-klinikken – i mars er det ugjenkalleleg slutt.

Alle andre parti i helsekomiteen – Frp, Krf, SV, Raudt og Pasientfokus – gjorde felles sak med Venstre. Men det er ikkje nok til å få fleirtal.

Ikkje eit luksustilbod for velståande vestkant-kvinner

Kvifor er dette ei viktig sak? Er ikkje ABC-klinikken berre eit «luksustilbod for velståande vestkant-kvinner», slik nokon har hevda? Handlar ikkje dette berre om at «bortskjemte Oslo-folk» må finne seg i å få same type standard-fødselstilbod som resten av landet?

Nei, det er ikkje så enkelt. Det handlar om mykje meir. Det handlar om at ABC-klinikken ved Ullevål sjukehus er landets beste og mest «spissa» fagmiljø på å hjelpe kvinner til å føde mest mogleg naturleg – utan medikament og inngrep. Jordmødrene på ABC-klinikken er spesialistar på å la kvinnekroppen gjere det den er skapt for, og gripe inn berre når det trengst.

Jordmødrene på ABC-klinikken er spesialistar på å la kvinnekroppen gjere det den er skapt for, og gripe inn berre når det trengst.

Alfred Bjørlo
Helsepolitisk talsperson i Venstre

Forsvinn ABC-klinikken, forsvinn dette fagmiljøet – og kompetansen og kunnskapen dei kan tilføre fødetilbod over heile landet. Venstre meiner flest mogleg bør få tilbod om naturleg fødsel i trygge og stabile omgjevnader, med «god tid» og plass til begge foreldre å vere saman.

Når vi no legg ned landets beste fagmiljø på naturlege fødslar som «standardløysing» - og jordmødrene her blir spreidde for alle vindar – då har vi tapt noko vesentleg i den norske føde-omsorga samla sett.

To barn fødde på ABC-klinikkar

Eg har vore så heldig å få vere med på fødselen av begge våre barn på ABC-klinikkar: Først på Storken i Bergen i 2000, så på ABC-klinikken i Oslo i 2003 (den gong på Aker sjukehus).

Det var fantastiske rammer rundt fødslane, som eg unnar flest mogleg vordande foreldre å få oppleve på liknande måtar.

Alfred Bjørlo
Helsepolitisk talsperson i Venstre

Det var fantastiske rammer rundt fødslane, som eg unnar flest mogleg vordande foreldre å få oppleve på liknande måtar.

For den politiske kampen for eit kvalitativt best mogleg fødetilbod er ikkje slutt. Den må og skal halde fram med full styrke.

Jordmødrene rundt om i Noreg fortener best mogleg rammer for jobben dei legg ned – uansett type fødetilbod, type sjukehus eller barsels- og svangerskapsomsorg elles.