Vi må jobbe breitt for å endre lønnsforskjellane

Feil utvikling

Utviklinga går feil veg. Dette er nyttig kunnskap å ha med når vi går inn i lønnsoppgjeret i år. 

Som tillitsvald i ei fagforeining med hovudvekt av kvinnelege medlemmer er lønnsutviklinga for kvinner svært viktig. Vi har mange medlemmer i typiske kvinneyrke som helse- og omsorg, yrkesgrupper som er heilt avgjerande for velferdstenestene våre. 

Fleire løysingar må på plass

Skal vi lykkast med å få likelønn i Noreg, må vi jobbe breitt. 

Vi treng sentrale, koordinerte lønnsoppgjer som løftar dei store kvinneyrka som helse- og omsorgssektoren og oppvekst. Dette er yrke som i tillegg til låg lønn også har store utfordringar knytt til deltid og høgt sjukefråvær. Samtidig er behovet for fleire folk inn i desse yrka store. Ifølgje Navs omverdsanalyse vil vi til dømes mangle 24.000 helsefagarbeidarar innan 2040.

Det er også nettopp innan helse- og sosialtenestene at vi finn den høgaste andelen deltidsarbeid, med 32 prosent ifølgje SSB. Same rapport viser også at kvinner jobbar dobbelt så mykje deltid som menn.

Fleire heiltidsstillingar, satsing på auka kompetanse, og betre oppgåvedeling med bruk av rett person på rett plass, er nokre av tiltaka som må på plass i tillegg til lønnsutvikling.

Vi må alltid jobbe for at tilsette skal å få ein balanse i arbeidslivet. Forskjellane mellom sektorane i spørsmål som lønn og sjukefråvær går ut over rekrutteringa, det går ut over kvaliteten på tenestene, og det går ut over det langsiktige arbeidet med strukturell likestilling. Dessverre er dette problem som framleis er relevante, og som vi i Delta tek med oss inn i lønnsoppgjeret.